بە ناوی كۆمیتەی بەڕێوەبەریی گشتیی‌و هەیئەتی ئامادەكاری پێنجەمین كۆنگرەی یەكیەتیی لاوانی دێموكراتی كوردستانی ئێران لە ژێر ناوی كۆنگرەی: "ئۆگرانی رێبازی قاسملوو"و بە دروشمی :"لاوانی وشیاری كوردستان هێزی رۆنانی كۆمەڵگایەكی پێشكەوتوون"، پڕ بەدڵ بەخێرهاتنتان پێ دەڵێم‌و هاتنتان مایەی شانازییە بۆ رێكخراوەكەمان...
لاوانی ئازادیخواز‌و مافخوازی كوردستان!
نوێنەرانی بەڕێزی كۆنگرە!
نوێنەرانی رێكخراوە كوردستانییەكان!
میوانانی بەڕێز!
بە ناوی كۆمیتەی بەڕێوەبەریی گشتیی‌و هەیئەتی ئامادەكاری پێنجەمین كۆنگرەی یەكیەتیی لاوانی دێموكراتی كوردستانی ئێران لە ژێر ناوی كۆنگرەی: "ئۆگرانی رێبازی قاسملوو"و بە دروشمی :"لاوانی وشیاری كوردستان هێزی رۆنانی كۆمەڵگایەكی پێشكەوتوون"، پڕ بەدڵ بەخێرهاتنتان پێ دەڵێم‌و هاتنتان مایەی شانازییە بۆ رێكخراوەكەمان.
بەڕێزان!
لە كاتێكدا كە پرۆسەی بەجیهانیبوون‌و گوتاری مۆدێڕنیتە بە خێراییەكی زۆرەوە هەموو كۆمەڵگای جیهانی دەتەنێتەوە‌و بە كەڵكوەرگرتن لە ئامرازەكانی پێوەندییە گشتییەكان كاریگەریی لەسەر هەموو بیاڤە گشتیی‌و تاكەسییەكانی جڤات دادەنێت، دێموكراسی‌و بەها مرۆییەكان وەكوو پرسێكی جیهانی‌و بزووتنەوەیەكی سەرتاپاگیر خۆیان نواند‌و دێموكراسی لە ئاستی سیاسی‌و كۆمەلایەتیدا گەیشتە تەشقی خۆی بە چەشنێك كە دەتوانین بڵێین هەنووكە سیستمە ئیدۆلۆژییە رەگداكوتاوەكان‌و رێژیمەكانیان كە بێ‌سڵكردنەوە لە رێگای هێژموونییەكی ستەمكارانەوە، دەست لە هەموو بیاڤە سیاسی ـ كۆمەڵایەتییەكانی جڤات وەردەدەن، لە كۆمەڵگای ئەمڕۆی جیهانیدا لە لایەن خەڵكەوە جێگای متمانە نین‌و رەواییان نەماوە.
لەم نێوەدا لاو وەكوو توێژێكی زیندوو و ئاوانگاردی كۆمەڵگا زیاتر لە هەموو توێژەكانی دیكەی جڤات، دەكەونە ژێر باندۆری گۆڕانكارییە سیاسی‌و كۆمەڵایەتییەكانەوە. بە لەبەرچاوگرتنی رەوشی نالەباری جیهانی لە رووبەڕوو بوونەوە لەگەڵ قەیرانی شەڕ، نائەمنی، داتەپینی ئابووری، پێشێلكاری مافی كەمینە نەتەوەكان، مافەكانی مرۆڤ، تیرۆریزم، پیسبوونی ژینگە، سەرەڕۆیی‌و دیكتاتۆری، رەگەزپەرستی‌و شۆڤینزم‌و ئەو بەربەستانەی كە مرۆڤ بە دەستی مرۆڤ دەچەوسێتەوە، لە تەنگەژەیەكی قووڵدایە‌و بێگومان لە ئاستی جیهانیدا رەوشی لاوانی خستۆتە مەترسیەوە.
جێگای ئاماژەیە كە ئەزموونی زیاتر لە سێ دەیەی دەسەڵاتداریەتی داخراوی رێژیمی كۆماری ئیسلامی، بە هۆی سەپاندنی سیاسەتێكی نامرۆڤانە‌و بەدوور لە هەرچەشنە پرنسیپێكی دێموكراتیك، لە رێڕەوی هەڵتەكاندنی دامەزراوە كۆمەڵایەتیەكانی هەناوی كۆمەڵگاوە، بێ هیچ چەشنە بەربەست‌و لەمپەرێكی ئەوتۆ، لە سەرەوەڕا خۆی بەسەر هەموو بیاڤە كۆمەڵایەتییەكانی خوارەوەدا، دەسەپێنێ‌‌و كۆمەڵگای لە داخراویدا هێشتۆتەوە. بۆیە هەڵاواردنە نەتەوەیی، ئایینی، جینسی‌و كولتوورییەكان لە ئێراندا بە زەقی بەرچاو دەكەوێت‌و بێ‌چارەسەر هێشتنەوە‌و پەرەپێ‌دان بەو هەڵاواردنانە، بۆتە ئاخێزگەی بزاڤە كۆمەڵایەتییەكان. جێگای باسە كە لە وەها رێژیمێكدا پێگەی لاوان، لە دۆخێكی نالەباردایە‌و ئاسۆی لاوەكان ناڕوون‌و تاریكە. سیاسەتگەلێك وەكوو: هەژاری، بێكاری، قەیرانی شوناس، خەسارە كۆمەڵایەتییەكان، سەركوت‌و ئێعدام‌و سەدان كێشەی دیكەی ئەمڕۆكەی لاو، كە بەرۆكی لاوانیان گرتووە‌و رۆژ لە داوی رۆژ پەرە دەستێنێ.
بەڕێزان!
سەرمایە‌و سامانی سیاسی‌و كۆمەڵایەتی نەتەوەكەمان، بەرهەم‌و دەسكەوتی ئامانجە سیاسی‌و كۆمەڵایەتییەكانی نەتەوەیەك بووە كە بزووتنەوەی میللی ـ دێموكراتیكی كورد لە گۆڕەپانی خەباتدا، گرینگی تایبەتی پێ داوە‌و لە ساتەوەختە تاریكەكان‌و ئاستەنگەكانی خەباتدا، زۆرترین قوربانی بۆ داوە. لە خەباتی دێموكراسیخوازی نەتەوەكەماندا سەقامگیری پرۆسەی ئاسوودەیی ژیانی كۆمەڵانی خەڵك، ئازادی‌و دێموكراسی، هەمیشە بەرژەوەندییە نەتەوەیییەكانی نەتەوەكەمانی كردۆتە ئاوێنەی باڵانوێنی خەبات‌و هەر ئەوەش بۆتە هۆی ئەوەیكە ببێتە خاوەن پێگەیەكی بەهێزی كۆمەڵایەتی‌و سیاسی لە ئاستی جیهانیدا.
یەكیەتیی لاوانی دێموكراتی كوردستانی ئێران پتر لە 60 ساڵە لە گۆڕەپانی خەباتدا چالاكانە‌و ماندوونەناسانە لە پیناو دابینبوونی مافە سێنفی‌و نەتەوەیییەكانی لاوانی رۆژهەڵاتی كوردستاندا خەبات دەكات‌و ئەزموونی خەبات‌و بڕینی قۆناخە ئەستەم‌و دژوارەكان‌و پێداگری لەسەر خەبات لە پێناو ئامانجەكانی لاواندا، یەكیەتیی لاوانی وەكوو دینامیزمێكی بەهێز لە رۆژهەڵاتی كوردستاندا دەرخستووە. یەكیەتیی لاوان لە گۆڕەپانی كۆماری دێموكراتیكی كوردستاندا، هێزی چالاك‌و ئەكتیڤی كۆمار‌و لە سەردەمی پاش كۆمار، هێزی مەیدانەكانی خەباتی راپەڕینی 46 ـ 47و شۆڕشی بەشكۆی گەلانی ئێران، لە مەیدانی بەرگریی لە كوردستان، بە وێنەی هێزی پێشمەرگە، پێشەنگی خەبات لە چیاكانی كوردستان‌و لەم سەردەمەشدا وەك هەمیشە هێزی خرۆشانی جەماوەری‌و رابوونی لاوان لە رۆژهەڵاتی كوردستاندایە‌و لە ئاستی نێونەتەوەییشدا بە ئەندامبوون لە رێكخراوی گەورەی ئەنترناسیۆنال سوسیالیستی لاواندا‌و زۆر رێكخراوی دیكە، بۆتە تریبوونێكی بەهێز بۆ گەیاندنی دەنگی مافخوازیی لاوانی كورد بە هەموو جیهان.
میوانانی هێژا!
كۆمیتەی بەڕێوەبەریی گشتیی یەكیەتیی لاوانی دێموكراتی كوردستانی ئێران، رێكەوتی 21ی خاكەلێوەی 1388ی هەتاوی، لە هەشتەمین كۆبوونەوەی خۆیدا بە هەست بە بەرپرسایەتیی كردن بەو رەوشە تایبەتیەی جیهانی‌و ناوچەی‌و بە پێی بەرنامە‌و پێڕەوی نێوخۆیی ئەو رێكخراوەیە، هەیئەتی ئامادەكاری بۆ بەستنی پێنجەمین كۆنگرەی یەكیەتیی لاوانی دێموكراتی كوردستانی ئێرانی پێكهێنا‌و كارەكانی لە پێوەندی لەگەڵ كاروباری كۆنگرەدا پێ ئەسپارد. هەیئەتی ئامادەكاری كۆنگرە كە پێكهاتبوون لە: لێژنەی راپۆرتی كۆنگرە، لێژنەی پێداچوونەوە بەسەر بەرنامە‌و پێڕەو، لێژنەی هەڵبژاردن، لێژنەی سكاڵا‌و پێشنیار، لێژنەی راگەیاندن، لێژنەی پەیام بۆ كۆنگرە، كارەكانی خۆی بە وردبینی تەواوە و بە پشت بەستن بە پرنسیپە دێموكراتیكەكان بەئەنجام گەیاند.
بەڕێزان!
ئێمە وەكوو یەكیەتیی لاوانی دێموكراتی كوردستانی ئێران، پەروەردەی قوتابخانەی دێموكرات‌و ئۆگرانی رێبازی قازی، قاسملوو‌و شەرەفكەندی، پێمان وایە كە بۆ وەفاداربوون‌و ئەمەگداری بە رێبازی قاسملوو و وەبیرهێنانەوەی یادی 20 ساڵەی شەهیدبوونی ئەو رێبەرە شۆڕشگێڕ‌و مۆدێڕنەی نەتەوەكەمان‌و هاوخەباتی لەگەڵ خەڵكی كوردستانی وەفادار بە رێبازی شەهید د.قاسملوو، كۆنگرەكەمان بە ناوی ئەو شەهیدە دێموكرات‌و شۆڕشگێڕە مۆدێڕنەی نەتەوەكەمان دەكەینەوە‌و رێبازی پڕ لەسەروەری دەكەینە هەگبەی داهاتووی رێكخراوەكەمان.
ئێمە نەوەكانی ئەمڕۆ‌و بەڕێوەبەرانی داهاتووی وڵاتەكەمان، لە قۆناخێكی ئەستەم‌و دژواری خەباتی دێموكراسیخوازی وڵاتەكەمانداین‌و كۆنگرەكەمان لە ساتەوەختێكی پڕ لە گۆڕان‌و پرسهەڵگری جیهانی‌و ناوچەییدا دەبەسترێ كە جیهان‌و ناوچەی رۆژهەڵاتی نێوەڕاست ئاوس بە زۆر گۆڕانە كە هەموو بیاڤە سیاسی‌و كۆمەڵایەتییەكان دەگرێتەوە‌و راستەوخۆ شوێن لەسەر هەموو چین‌و توێژەكانی كۆمەڵگا دادەنێ. بۆیە سەرخستنی ئامانجەكانی نەوەكانی رابردوو و بونیادنانی داهاتوویەكی رووناك‌و كۆمەڵگایەكی پێشكەوتوو ئامانجمانە‌و لە پێناو ئامانجە سێنفی‌و نەتەوەیییەكانماندا شیلگیرانە پێداگری دەكەینەوە.
بەڕێزان!
ئیزن بدەن لە كۆتاییدا‌و لە رێگای ئەم تریبوونەوە سڵاو بنێرین بۆ ئەو لاوە تێكۆشەرانەی یەكیەتیی لاوان لە نێوخۆی وڵاتدا كە بە هۆی هەلومەرجی تایبەتی خەبات نەماتوانی لە كۆنگرەدا بەشداریان بكەین بەڵام بەپەیامی خۆیان گڕوتینێكی دیكەیان داوەتە كۆنگرەكەمان، لێرەوە دەستی هاوخەباتی‌و ماندوویەتی‌و كۆڵنەدانتان بەگەرمی دەگوشین‌و گومانی تێدا نیە بەبوونی ئێوە وەكوو هێزی سەرەكی لە هەژاندنی دەریای كۆمەڵانی خەڵكی كوردستاندا‌و خەباتی بەردەوامیتان‌و پشتئەستووربوونتان بە رێبازی دێموكرات، ئەژنۆكانی دیكتاتۆری‌و سەرەڕۆیی لە ئێران‌و كوردستاندا شل‌و بێ‌هێزن‌و بەو هیوایەش كە كۆنگرەی داهاتووی رێكخراوەكەمان لە نێو كۆڕی گەرمی ئێوە لاوانی خەباتكار‌و ئازادیخواز‌و كوردستانی ئازاد‌و دێموكراتیكدا ببەستین.
بۆیە بەو هیوایە كە كۆنگرەكەمان ببێتە بەردی بناخەی بونیادنانی كۆمەڵگایەكی پێشكەوتوو كە خەون‌و ئامانجی خەباتە رەواكەمانە‌و وەكوو هەمیشە یەكیەتیی لاوان بێتە سەنگەری ئازادی، قوتابخانەیەك بۆ فیربوونی وانەكانی دێموكراسی، ماڵێك بۆ پێكەوەبوون‌و هاودەنگی‌و یەكڕیزی لاوانی رۆژهەڵاتی كوردستان.
لە كۆتاییشدا سوپاسی دەفتەری سیاسیی حیزبی دێموكرات‌و ئۆرگانەكانی حیزب‌و ئەو كەسانە دەكەین كە بۆ ئامادەكاری كۆنگرەكەمان هاوكارییان كردووین.
سەركەوتن بۆ كۆنگرەی پێنجەمی یەكیەتیی لاوانی دێموكراتی كوردستانی ئێران!
سڵاو لە بنەماڵەی سەربەرزی شەهیدانی یەكیەتیی لاوان!
بڕووخێ رێژیمی دیكتاتۆر‌و كۆنەپەرستی كۆماری ئیسلامی ئێران!
1ی گەلاوێژی 1388ی هەتاوی
هەیئەتی ئامادەكاری كۆنگرەی پێنجەمی یەكیەتیی لاوان
هیچ نظری موجود نیست:
ارسال یک نظر