بەسیج‌و دیاردەی بە بەسیج كردنی لاوانی كوردستان

كۆماری ئیسلامی لە دەسپێكی دەسەڵاتداریی خۆیدا، وەهمی پیلان‌و گریمانەی دوژمن‌سازیی پێڕەو كردو كۆنترۆڵ‌و دەستڕاگرتن بەسەر ناوچەكە‌و ناردنە دەرەوەی شۆڕشی بە "شۆڕشی دووهەم" ناساند....

رێژیم بەهۆی ئەو هەڵە زەقانەوە كە لە سەرەتاوە لە هەمبەر نێوخۆ‌و دەرەوەی وڵاتدا تووشی هاتبوو، پێویستی بە هەبوونی هێزێكی داردەست‌و گوێ‌ لەمست، بۆ پاراستن‌و پارێزگاری لە دەسكەوتەكانی خۆی بوو. چونكە لەگەڵا ئەوەدا كە ئەرتەشیان لە كەسانی بەگومانی خۆیان تاغوتی‌و ناتەبا لەگەڵا ئامانجەكانیان پاكتاو كردبوو، بەڵام هێشتا متمانەیەكی ئەوتۆیان بە ئەرتەش نەبوو. جیا لەوانە، ئەوان هێزێكی گەورەیان دەویست كە بە جێگەی فەرمان‌ وەرگرتن لە یاسا‌و پارێزگاری لە گەل‌و وڵات، گوێ‌ لەمستی رێبەری رێژیم‌و گیان‌فیدای ئیدئۆلۆژی سەدەنێوەڕاستیی دەسەڵاتداران بێ‌. بەم بۆنەوە، خومەینی لە پێنجی سەرماوەزی ساڵی 58ی هەتاویدا، فەرمانی دامەزرانی بەسیج یان ئەرتەشی 20 میلیۆنیی دەركرد، بە پێی ئەو بڕیارە "شۆرای شۆڕشی ئیسلامی" لە رێكەوتی 19/4/59دا، رێكخراوی بەسیجی نەتەوەیی پێك هێنا. چونكە خومەینی باوەڕی وابوو "وڵاتێك كە بیست میلیۆن لاوی هەیە، دەبێ‌ بیست میلیۆن چەكداری هەبێ‌."
لە لایەكی دیكەوە هاوهەنگاو لەگەڵا بەسیج‌و ئەرتەش، دوو هێزی چەكداری دیكە پێك هاتبوون، واتا سوپای پاسدارانی شۆڕشی ئیسلامی‌و كۆمیتەكان، كە ئەم دوو هێزە، بەتایبەتی سوپای پاسداران وێڕای هێزی راهاتوو، كەرەستە‌و ئەزموونی نیزامیی رێژیمی پەهلەویی بە تەواوی لەبەر دەستدا بوو، هاوكاتیش دەست‌و پێوەندییەكانی رێژیمی پێشویان لە ئاستە جۆراوجۆرەكانی پێكهاتەی خۆیاندا رێك خستبوو، ئەم كۆمەڵە هۆكارە، هاوڕێ‌ لەگەڵا رووبەڕوو بوونەوەی توند‌وتیژ‌و بێ‌بەزەییانە‌و كۆنترۆڵكردنی هەمە لایەنەی كۆمەڵگا‌و پێكهێنانی فەزای ترس‌و تۆقاندن، بەستێنی بۆ خۆسەپاندن‌و تاكڕەوی دەسەڵاتداران ئامادە كردبوو. لەسەر ئەو بنەمایە لە ساڵی 59دا هێزەكانی بەسیج لەگەڵا سوپای پاسداران تێكەڵا كران‌و لە ژێر ناوی "واحیدی بەسیجی موستەزعەفان"دا، بوونە بەشێك لەوان. بە رۆیشتنی ئەم هێزانە بۆ نێو ریزەكانی سوپا، ئەم هێزە بوو بە یەكێك لە تەیارترین‌و بەربڵاوترین تۆڕەكانی چەكداری ـ تێرۆریستی لە ئاستی ناوچەیی‌و جیهاندا، كە هاوكات لەگەڵا كردەوەی جەنایەتكارانە، ئیمكاناتێكی زۆریشی لە خزمەتدایە، تا بەهۆی بڕێك چالاكیی مەدەنی، جیا لە ژێرركێف خستنی شادەمارە ئابورییەكانی وڵات، كردەوە دژە مرۆییەكانیشی تاڕادەیەك بشارێتەوە، یاخود بیر‌وڕای گشتی‌و جیهان لە هەمبەر كارە تیرۆریستییەكانی بە لاڕێدا بەرێ‌. چونكە سوپای پاسداران جیا لە دارابوونی هێزەكانی زەوینی، هەوایی، دەریایی، هێزەكانی سوپای قودسی بۆ ئۆپەراسیۆنی دەرەوەی سنوور لە ئاستی جیهان‌و ناوچە‌و هەروەها، یەكەی "حفاڤت اگلاعات"ی سوپا، وەكوو رێكخراوێكی هاوتەریبی سازمانی " اگلاعات و امنیت"ی كۆماری ئیسلامی بەتوانا‌و پێداویستیی ماددی‌و ئینسانی‌و خۆبەڕێوەبردنی بەرین‌و فەرمانبەری لە خودی رێبەری رێژیم لەبەردەستدایە‌و بە تایبەتی كە، هێزەكانی بەسیجیشی بۆ بەناو چالاكیی ئاوەدانی، فەرهەنگی، رامیاری، راگەیاندن‌و وەرزشی‌و ... هێناوەتە گۆڕەپانی كۆمەڵگای ئێران.
یەكەمین ئەزموونی بەسیجییەكان بەشێوەی پراكتیك، كە لە رێگەی گروپەكانی بەناو "مقاومت مردمی" لە بنكەكانی بەسیج، كە لەو كاتەدا لە مزگەوتەكانی سەرانسەری وڵات پێك هاتبوو، یارمەتی گەیاندن‌و پشتیوانی لە سوپا‌و كۆمیتەكان بۆ سەركوت‌و لە خاك‌و خوێن گەوزاندنی بزووتنەوەی نەتەوەكانی ئێران بوو، كە هەنووكەش برینی ساڕێژنەكراوی كردەوە كوێرانەكانی ئەوان لە ئێران‌و كوردستاندا دیار‌و بەرچاوە، گروپگەلـێ‌ كە چاو‌و گوێ‌بەستراو بۆ پەژراندنی فەرمانی ئیمامی خۆیان، ماڵ‌و حاڵی خەڵكیان سوچ بە سوچی سەرزەوینی ئێران‌و كوردستان، بێ‌ هیچ دڕدۆنگی‌و پرسیارێك، تێك دا. لە روانگەی بەرپرسانی رێژیم‌و هێزەكانی بەسیجدا، بەسیجی دەبێ‌، (1ـ خوازیاری شەهادەت بێ‌، 2ـ لە رێی خودا جیهاد بكا، 3ـ لە رێی خودا خزمەت بكا،...
پاش گۆڕانكارییەكانی ساڵی 69ی هەتاوی لە سوپای پاسداراندا، بورۆكراسیی رێكخراوەیی بەسیج بە شێوەی خوارەوە سازمان دراوە، كە بەرزترینی "ناوچەی مقاومەتی بەسیج"ە، كە بێجگە لە تاران كە 29 ناوچەی مقاومەتی بەسیجی تێدایە، لە تەواوی ناوەندی پارێزگاكانی وڵاتدا، یەك ناوچەی بەرگریی هەیە. هاوتەریب لەگەڵا ئەو ناوچانەش، لە تەواوی شارەكانی وڵاتدا، "ناحیەی مقاومت بسیج" هەیە كە لە چەندین ناوەندی بەرگری پێك هاتووە‌و كۆی ئەوانە لە وڵاتدا زیاتر لە 3000 حەوزە دەبێ‌. لە هەر شار‌و شارۆچكەیەك یەك یا چەند گوردانی عاشورا (تایبەتی پیاوانی بەسیجی)‌و گوردانی ئەلزەهرا (تایبەتی ژنانی بەسیجی) پێك هاتوە كە ئەوانیش لە پۆلێن‌بەندیی نێوخۆیی خۆیاندا بە گرووپەكانی (ساروڵڵا‌و كەوسەر) دابەش بوون، چوونكە بە گوتەی خومەینی: "جیهاد لە ئایینی ئیسلام لە فروعی دین‌و واجیباتە، كە مانەوەیی ئایین بەوەوە بەستراوەتەوە، چوونكە دەبێتە هۆی سەربڵیندی، گەورەیی‌و كەماڵا‌و سەربەخۆیی كۆمەڵگای موسوڵمانان". بە پێی ئەم بنەمایە هاتنی ژنانی بۆ نێو ریزەكانی بەسیج بە فەرز زانیوە‌و گوتوویەتی: "حەزرەتی زەهرا" مجاهدە و مخاگبه"ی لەگەڵا حكوومەتەكانی سەردەمدا بووە، ئەوانی دادگایی كردوە‌و ...". لە نموونەی چالاكییەكانی ئەوان، هەبوونی ژنانی گۆپاڵا بەدەست لە شەقامەكان‌و سەركوتی بێ‌بەزەییانەی ناڕەزایەتی دەربڕین‌و كۆبوونەوەی ژنان بە درێژایی ئەم ساڵانەی دوایییە‌و ... . حكوومەت لە لایەك بەهۆی گەندەڵی‌و رانت‌خۆری‌و سیاسیەتی هەڵەی ئابووری بۆتە ئامیانی هەڵاوسانی روو لە گەشە لە كۆمەڵگادا، بە جۆرێ‌ كە لە ئێرانی ئێستادا، 25%ی كۆمەڵگا بە رادەی 75%یتری كۆمەڵا، سامانیان كۆكردۆتەوە، لە حاڵێكدا زۆربەی خەڵك لە ژێر هێَڵی هەژاریدان‌و برسیەتیش هاوار دەكا، لە لایەكی دیكەوە حكوومەت بە بنیاتنانی ناوەندی پشتگیریی وەكوو، كۆمیتەی ئیمداد، ئیدارەی بێهزیستی، رێكخراوی ئەوقاف‌و كار‌وباری خێرخوازی، بونیادی جانبازان‌و موستەزعەفان، قوتابخانەی رەستگاران، سەندوقی قەرزولحەسەنەی بەسیجیان، نەخۆشخانەی خۆڕایی‌و تایبەتی بۆ بەسیجیان، فرۆشگای بەسیجیان‌و چەشن‌و جۆرەكانیتری یارمەتیی دەرمانی‌و خواردەمەنی، بەدوای راكێشان‌و بەستنەوە‌و نزیك‌كردنەوەی كۆمەڵانی هەژاری كۆمەڵگا بە دەسەڵاتەوەیە. لەبەر ئەوەی كە حكومەت جیا لە بەكارهێنانی بەسیج لە كاتی جیاوازدا، لە كاتی هەڵبژاردنەكانیشدا وەكو بەرگێكی براوە بۆ سەركەوتنی نزیكترین كەس بە پێكهاتەی بەسیج‌و گزكردن لە كارەكان قازانج دەكا، بۆ نمونە دەكرێ‌ بە فێڵكردنی بەرینی بەسیجیان لە هەڵبژاردنەكانی مەجلیسدا ئاماژە بكەین.
یەكێك لە كۆڵەكە بنچینەییەكانی گەشەكردنی بەسیج، كە رێژیمیش سەرنجێكی تایبەتی پێداوە، بەسیجی دانش ئامووزی یان قوتابیانە. بەسیجی دانش ئامووزی كە ئەركی چالاكی لە قوتابخانە‌و دۆزینەوەی كەسانی باوەڕمەند‌و بەكەڵكی بۆ دواڕۆژی رێژیمی لە ئەستۆ دایە، لە قوناخەكانی جیاوازی خوێندن دا، كاری ئەندام‌وەرگرتن دەكا. هەڵبەت رێژیم لە سەرەتای سیستمی راهێنانەوە، هەوڵی جێگیركردن‌و پەرەسەندنی باوەڕی بەسیجیگەری دەدا‌و بۆ ئەو مەبەستە، "حوسێن فەهمیدە" وەكو سەمبۆڵی مێرمنداڵی ئێرانی بە قوتابیان دەناسێنێ‌‌و پێیان دەڵێ‌ كە دەبێ‌ چاولێكەری ئەو بن، ئەم جۆرە سەمبۆڵا سازیانە تەواو دەقاودەقی نمونەسازیەكانی كۆمۆنیست ـ ئیستالنینەكانی سۆڤیەتی پێشویە. هەروەها رێژیم لە رۆژی 8ی خەزەڵوەر، رۆژی كوژرانی حوسێن فەهمیدە بەسیجیی(؟!) 13 ساڵەی ئێرانی، وەكو رۆژی "مێرمنداڵان"‌و "بەسیجی دانش ئامووزی" داناوە. رێژیم لە رێگەی پڕ‌وپاگەندەی بەربڵاوی راگەیاندن‌و بڵاوكردنەوەی فۆرمی ئەندامەتیی بەسیج‌و ناونووسكردن‌و ئامادەیی دەربڕین بۆ "عەمەلیاتی ئیستشهادی" لە بەرانبەر شەڕكەرانی دژی خودا (محاربین) لە قوتابخانەكاندا، مێرمنداڵا‌و لاوانی ئێران‌و كوردستانیان خستۆتە نێو بازنە‌و گەمەیەكی ژەهراوییەوە‌و، ئەوان بە بیرۆكەی جیهادی‌و گومانی پیلان‌و ئەندێشەی نەرێنی پەروەردە دەكەن.
فاڵانژە بەسیجییەكان كە لە ژێر كاریگەریی پڕ‌وپاگەندەی ژەهراویی رێژیمدا هەڵخەڵەتێنراون‌و لەبەر بڕێك ئیمتیاز‌و پشتیوانیی ماڵی، خۆیانیان خستۆتە بەرەی دژەگەلییەوە، بە جۆرێ‌ كە حكومەت دەیەوێ‌ لە رێگەی ئەوانەوە، كۆمەڵگا‌و ریزەكانی خەڵك بە دوو لایەنی دژ‌و تەبای خۆی لەت بكا‌و بە پێكهێنانی دووبەرەكیی نێوخۆیی لە نێوان كۆمەڵگادا، تەمەنی حوكمڕانیی خۆیان دەمێك درێژتر بكەنەوە. بەڵام لاوانی ئێران‌و كوردستان هەمیشە لە گۆڕەپانی خەباتدا شەقامەكانیان وەلەرزە هێناوە‌و ترسیان خستۆتە دڵی داگیركەران.