شەوانە
١
٢
لای من هەر شەوێک، پەنجەرەیەکی دیکە
بەڕووی ژیاندا دائەخرێت، باش لە بیرمە، باوکم، سەریناکەی لە باوەش ئەنا، جگەرەیەکی
لە قوتووی تووتنەکەی ئەپێچایەوە، ئەیکرد بە دەمنەکەیەوە، مژێکی قووڵی لێ ئەدا و لە
پەنجەرەکەوە ئەیڕوانییە دەرەوە، جار ناجارێ باش ئاگای لە دەرەوە نەبوو، ئەیگوت
ڕٶلە ئا دانەیەکتان بڕواتە دەرەوە، بزانە وەشتە، خۆشە، بارانە ئەی چی؟ دایکم، کە
زۆر بێتاقەت ئەبوو بەدەستیەوە، ئەیگوت کورە ئەرێ وەشتە، بەرد ئەبارێت ... باوکم
ئەگەر توڕە نەبوایە، ئەوا ئەچوە ناو بێتاقەتییەکانی خۆی و ئەیگوت، ئەمشەویشمان
پێوە دا. لای منیش کە بیری ئەو ساتانە دەکەمەوە، ئەمشەویش پەنجەرەیەکی دیکەمان
داخست، نازانم تاکەی بە تەمای پەنجەرەیەک بین، کە بۆ هەمیشە پەنجەرەکانی دیکەمان
بەسەردابخات .... ژیان زۆر نامەردانە ئەجوڵێتەوە، زۆریش!
وەک دوایین دێڕێک؛ شەوانە ئەبینە قەلەندەر و رۆژ
ئەبینە رۆژگارپەرستێکی دەربەدەر؛ بۆیە نە رۆژگار ئەمانگرێتە خۆی؛ نە شەو ئەهێڵی
بستێک خاکمان هەبێت و ئەمەیە یەکەم دەرووی نووسین.
٣
ئەمەش تیرێژە چیرۆکێک:
رەشمارێکی تەنیا، ماوەیەک بوو شەیدای
"مانگ" ببوو. چەندین جار بە دزی مانگەوە کە لە کانی خۆی ئەشۆرد، تەماشای
ئەکرد و سەرتاپای باڵای ئەبینی، تەنانەت بە ڕووت و قووتی. نیوەشەوێ هەستا و
ئارەزووی سەرکەش بوو. ویستی کوڵی دڵی دامرکێنێ. کە نزیکی کانی بوویەوە، مانگ رووت
ببوویەوە. ویستی باوەشی بگرێت و تامەزرۆی لە حەزی مانگەشەو بشکێنێت. خۆی هاوێشتە
کانی، تا لە ناکاو مانگ دڵی رەنجا و رۆشت.
*** شەوی پڕ
ئەستێرە، بە هۆلەندی De
sterrennacht،
یەکێک لە بەرهەمە ناودارەکانی نیگارکێش ڤینسان ڤوون گوگ (١٨٥٣ ـ ١٨٩٠)
Afrasiab Grami
23.10.2013; 00:28
هیچ نظری موجود نیست:
ارسال یک نظر